Shërbimet e navigacionit ajror

Departamenti i Shërbimeve të Navigacionit Ajror (SHNA) është përgjegjës për rregullimin, monitorimin, inspektimin, çertifikimin dhe mbikëqyrjen e përgjithshme të sigurisë së Ofruesve të Shërbimeve të Navigacionit Ajror (OSHNA) brenda Republikës së Kosovës. Ky departament siguron që legjislacioni dhe standardet e sigurisë për OSHNA-n të jenë në përputhje me standardet dhe praktikat e rekomanduara të ICAO-së, legjislacionin (acquis) e aviacionit të BE-së, duke përfshirë rregullat e EUROCONTROL-it.

Bazuar në Ligjin 03/L-051 për Aviacionin Civil, AAC-ja është përcaktuar si Autoritet Mbikëqyrës Kombëtar (AMK) siç parashihet me Rregulloren (KE) nr. 549/2004 të Parlamentit Evropian të Këshillit të 10 Marsit 2004, i cili themelon kornizën për krijim të Qiellit të Vetëm Evropian. Departamenti i SHNA-së zbaton të gjitha detyrat dhe obligimet e AMK-së, në emër të AAC-së.

Si i tillë, ky departament është përgjegjës për çertifikimin dhe mbikëqyrjen e vazhdueshme të OSHNA-s brenda Republikës së Kosovës, e cila ofrom Shërbimet si më poshtë:

• Kontrollin e Trafikut Ajror (KTA);
• Komunikimin, Navigacionin dhe Vëzhgimin (KNV);
• Shërbimin e Informatave Aeronautike (SHIA); dhe
• Shërbimin Meteorologjik (MET).

Për më shumë, departamenti i SHNA-s është përgjegjës për Çertifikimin e Organizatave Trajnuese të cilat ofrojnë trajnime fillestare dhe rifrekuese për Kontrollorë të Trafikut Ajror (KTA) dhe mbikëqyrjen e vazhdueshme të sistemit trajnues të vendosur për të mbajtur kompetencën e KTA-ve. Departamenti i SHNA-së është përgjegjës për licencimin e KTA-ve dhe për aprovimin e planit të trajnimeve të njësisë dhe skemat e kompetencës të njësisë.

Departamenti i SHNA-së siguron që informatat aeronautike janë të publikuara në dokumentin Publikimi i Informatave Aeronautike të Kosovës (PIA) dhe janë të vendosura për përdorim nga operatorët të cilët operojnë në hapësirën e Kosovës.

Rregulloret