Lajme Pjesëmarrja në konferencën ndërkombëtare “AI IN THE SKY 2024”

Me ftesë të Drejtorit të përgjithshëm të Autoritetit të Aviacionit Civil të Republikës së Turqisë (DGAC), Prof. Dr. Kemal Yüksel, UD i Drejtorit të përgjithshëm i Autoritetit të Aviacionit Civil të Republikës së Kosovës, z. Burim Dinarama, së bashku me z. Kushtrim Musa Drejtor i Departamentit për Siguri të Fluturimeve, morri pjesë në Konferencën ndërkombëtar  “AI IN THE SKY 2024”, me datë 12-14 nëntor 2024 në Antalya, organizuar nga Organizata Ndërkombëtare e Aviacionit Civil (ICAO) dhe mbështetur nga DGAC e Republikës së Turqisë.

Kjo konference, u hap zyrtarisht nga Ministri i Transportit dhe Infrastrukturës së Republikës së Turqisë, z. Abdulkadir Uraloglu, dhe kishte si synim eksplorimin e ndikimit të inteligjencës artificiale (AI) dhe të të dhënave të mëdha në sektorin e aviacionit civil, duke marrë parasysh implikimet në sigurinë, efikasitetin, mbrojtjen e mjedisit dhe zhvillimin e qëndrueshëm të rrjeteve globale të aviacionit civil.

Kjo ngjarje bashkoi zyrtarë qeveritarë, liderë të industrisë, inovatorë të teknologjisë për të diskutuar integrimin e teknologjisë së inteligjencës artificiale (AI) për të rritur efikasitetin e hapësirës ajrore, përmirësimin e sigurisë dhe rritjes së qëndrueshme në rrjetet globale të aviacionit, duke theksuar rolin e ICAO-së në zhvillimin e një kuadri të unifikuar rregullator, në lehtësimin dhe adoptimin e sigurt dhe efikas të teknologjisë së inteligjencës artificiale (AI) në mbarë botën.

Përmes fjalimeve kryesore, diskutimeve në panel, punëtorive interaktive, ekspozitave dhe mundësive të rrjetëzimit, pjesëmarrësit u njoftuan me njohuri të çmueshme në avancimin e zgjidhjeve të orientuara nga inteligjenca artificiale (AI), dhe nxitjen e bashkëpunimit ndërkombëtar për të shfrytëzuar plotësisht inovacionin e drejtuar nga të dhënat në aviacion.

Gjatë kësaj konference z. Dinarama realizoi takim bilateral me Drejtorin e Përgjithshëm të Aviacionit Civil të Republikës së Turqisë, Prof. Dr. Kemal Yüksel me ç’rast u diskutua lidhur me marrëveshje bilaterale në mes të Republikës së Kosovës dhe Republikës së Turqisë, si dhe avancimin e bashkëpunimit në sfera të caktuara të aviacionit civil.

Po ashtu, Z. Dinarama pati edhe takime jo formale me Sekretarin e Përgjithshëm të Organizatës Ndërkombëtare të Aviacionit Civil (ICAO), Z. Juan Carlos Salazar dhe Z. Jorge Vargas, Drejtor i Byrosë për Zhvillim dhe Zbatim të Kapaciteteve (CDI).

Prezenca e Autoritetit të Aviacionit Civil të Republikës së Kosovës si dhe takimet e zhvilluara në këtë konferencë konsiderohen jashtëzakonisht të rëndësishme për rrugën e Kosovës për integrim në organizatat ndërkombëtare të sigurisë në Aviacionin Civil.