Lajme Shefi Ekzekutiv i sapoemëruar i “Limak Kosovo International Airport” z. Hakan Öztürk viziton Autoritetin e Aviacionit Civil të Kosovës, duke prezentuar një epokë të re të bashkëpunimit dhe zhvillimit të aeroportit

Të premten, më datë 12.01.2024, UD i Drejtorit të Autoritetit të Aviacionit Civil z. Alban Ramabaja së bashku me drejtorin e Departamentit të Aerodromeve z. Burim Dinarama mirëpritën Shefin Ekzekutiv (CEO) të sapoemëruar të “Limak Kosovo International Airport” – LKIA z. Hakan Öztürk së bashku me Drejtorin Financiar z. Gokhan Acikgöz në ambientet e Autoritetit të Aviacionit Civil. Vizita shënoi fillimin e një epoke të bashkëpunimit të përforcuar ndërmjet LKIA-së dhe AACK-së.

Gjatë vizitës, z. Hakan Öztürk bëri prezentimin e tij dhe shprehu entuziazmin e tyre për mundësinë për të punuar ngushtë me Autoritetin e Aviacionit Civil dhe rëndësinë e partneritetit ndërmejt aeroportit dhe organit rregullator, për të nxitur rritjen, inovacionin dhe sigurinë në sektorin e aviacionit.

Në këtë takim, z. Öztürk i prezentoi AACK-së objektivat e tyre për të rritur edhe më tutje kapacitetet dhe efikasitetin operacional të aeroportit në këtë periudhë kur numri i udhëtarëve është në rritje të vazhdueshme, për të përmirësuar përvojën e pasagjerëve dhe për të siguruar standardet më të larta të sigurisë dhe sigurimit në Aeroporti Ndërkombëtar të Prishtinës “Adem Jashari”.

Vizita ofroi një mundësi edhe për z. Hakan Öztürk për t’u njohur me proceset në vazhdim të Autoritetit të Aviacionit Civil, duke fituar një kuptim më të thellë të obligimeve të LKIA-së në aspektin e peizazhit rregullator dhe përputhshmërisë së Aeroportit Ndërkombëtar të Prishtinës “Adem Jashari” me standardet dhe suksesin kolektiv të industrisë së aviacionit.

Z. Öztürk dhe z. Acikgöz shprehën mirënjohjen për pritjen e ngrohtë dhe përgëzuan Autoritetin e Aviacionit Civil për përkushtimin tonë në ruajtjen e standardeve të larta të industrisë. Ata theksuan angazhimin e tyre për të punuar ngushtë me AACK-në për të identifikuar fushat me interes të përbashkët dhe për të eksploruar zgjidhje novatore për rritje të qëndrueshme.

Ndërsa industria e aviacionit vazhdon të zhvillohet, vizita e Shefit Ekzekutiv të LKIA-së në Autoritetin e Aviacionit Civil vendos një ton pozitiv për bashkëpunimet e ardhshme. Duke nxitur një partneritet të fortë, të dy entitetet janë të gatshme të kontribuojnë ndjeshëm në rritjen dhe zhvillimin e sektorit të aviacionit, duke garantuar njëkohësisht standardet më të larta të sigurisë dhe kënaqësisë së klientit.