Normalizimi i plotë i hapësirës së ulët ajrore të Kosovës, që pritet të ndodhë së shpejti, do të ketë efekt direkt në rritjen e shfrytëzuesve të aviacionit të përgjithshëm, dhe AAC-ja pret të ketë shtim të aplikuesve që synojnë të përdorin fushat ajrore në Republikën e Kosovës për shërbime të aviacionit të përgjithshëm.
Me qëllim të promovimit dhe stimulimit të zhvillimit të aviacionit të përgjithshëm në Republikën e Kosovës dhe me qëllim të ofrimit të informatave fillestare për aplikuesit eventualë për shfrytëzim të fushave ajrore, AAC-ja ka bërë analizën e gjendjes ekzistuese të të gjitha fushave ajrore në vend, si një kategori e veçantë e aerodromeve.
Përgatitja e këtij dokumenti është bërë duke analizuar gjendjen fizike dhe karakteristikat tjera të të gjitha fushave që janë identifikuar në territorin e Republikës së Kosovës nga inspektorët e AAC-së. Inspektorët e AAC-së, pjesëmarrës në përgatitjen e këtij dokumenti, kanë vizituar secilën nga këto fusha dhe me atë rast kanë bërë një vlerësim preliminar të gjendjes fizike dhe të infrastrukturës së fushave ajrore.
Në territorin e Republikës së Kosovës janë 12 fusha ajrore, të ndërtuara kryesisht ndërmjet viteve 1970 dhe 1987. Bazuar në vlerësimet e bëra gjatë vizitave si dhe informatave të mbledhura rreth fushave ajrore ekzistuese, mund të konkludohet se në shumicën e fushave ajrore vërehen dëmtime serioze të pistave, disa prej tyre janë të mbuluara me mbeturina dhe materiale inerte, apo janë duke u shfrytëzuar për qëllime që nuk lidhen me aviacionin civil.
Megjithatë, sipas vlerësimit të ekipit të inspektorëve të AAC-së, 5 nga 12 fushat ajrore janë në gjendje më të mirë fizike dhe infrastrukturore. Këto fusha mund të rifunksionalizohen për destinimin primar të tyre, që është aviacioni i përgjithshëm, me një investim dhe mirëmbajtje minimale, përderisa për të tjerat duhen investime të konsiderueshme.
Raporti i plotë i AAC-së për gjendjen e fushave ajrore në Republikën e Kosovës mund të gjendet në këtë lidhje Interneti