U.D. Drejtori i Përgjithshëm i Autoritetit të Aviacionit Civil (AAC) të Kosovës, z. Arianit Islami, së bashku me bashkëpunëtorë, ka pritur në një takim njoftues sot të Ngarkuarin me Punë të Ambasadës Gjermane, z. Christian Böttcher, i shoqëruar nga Drejtori Ekzekutiv i Odës Ekonomike Gjermano-Kosovare (KDWV), z. Besnik Vasolli.

Shkëmbimi i ideve mes z. Böttcher dhe z. Islami u përqendrua në mënyrën se si infrastruktura dhe rregullimi i aviacionit civil mund të vazhdojnë të zhvillohen, duke iu përshtatur nevojave të qytetarëve dhe duke u përgatitur për sfidat e së ardhmes.

Kjo vizitë vuri në pah rolin thelbësor që aviacioni civil luan në jetën e përditshme, duke lidhur njerëzit përtej kufijve dhe duke shërbyer si një shtyllë e rëndësishme e sigurisë, efikasitetit dhe lidhshmërisë. Për Kosovën dhe diasporën e saj të madhe në Gjermani, udhëtimi ajror përfaqëson një urë drejt vetëlindjes. Veçanërisht në prag të festave, Aeroporti Ndërkombëtar i Prishtinës shndërrohet në një vend ku distancat shuhen dhe familjet ribashkohen.

Palët shkëmbyen pikëpamjet e tyre mbi zhvillimet në këtë fushë dhe u pajtuan të vazhdojnë përcjelljen e proceseve përkatëse, si dhe të forcojnë bashkëpunimin e mëtutjeshëm në funksion të zhvillimit të aviacionit civil dhe hapësirës ajrore të Republikës së Kosovës.